De Franzoos un de starke Hinnerk vun Asendörp
(Navertellt vun A. Lühr, Hamburg im Jahre 1953)
Dat wöör in de Tied, as de Franzoosenkaiser Napoleon mit
siene Truppen dat ganze Hannöversche Land besett't harr un siene Suldaten sik as
de Herren övera1I upspelen deen. Ook in uns Heimaat in Jeßborg leeg een Trupp
Franzoosen. de uppassen müssen, dat de Buurn eer Stüern betolen, eern Weiten un
Roggen, Stroh un wat süns noch all ricbtig aflivern un niks gegen de
franzöös'sche Ordnnng ünnernehmen.
Jüst to de sülvige Tiet waan in dat Naverdörp Asendörp een
Buur, de heet Hinnerk. He wöör as de starkste Mann in de ganze Uemgegend bekannt
un harr al männig Proov vun siene Kräfte aflecht. Bekannt is ja woll de, wo he
een Ko bin'n Slachter vun'n Haken nööm un se den Pastoorn vör de Huusdöör
uphüng, dat de Pastoor nich ruutkamen kunn un döör dat Finster stigen müß.
All düsse Geschicht'n wöörn in jeden Kroog in de ganze Gegend
jümmer. wedder vertellt. So höör denn ook eenmal een franzöös'sche Korporal. de
as de staarkste Mann in sien ganz Regiment gellen dä, vun düssen starken Hinnerk
vun Asendörp. He wull aver de Geschicht nich recht glöven; he lacht daröver un
praal överall mit siene eegenen Kräft. As de Buurn in'n Kroog em uutlachen, nööm
he sick vör, den Hinnerk uptosöken un dat mit em uptonehmen.
An'n annern Morgen maak he sik up den Weg na Asendörp.
Uennerwegs. söög he up'n Felln en Buurn bi't Plögen. He güng up em to un fröög
em na den nöögsten Weg na Asendörp. De Buur - dat wöör de starke Hinnerk, wat
aver de Franzoos' nich wüß - keek em an, böör denn mit de rechte Hand de ganze
Ploog in de Hööcht un wies' den Franzoosen so de Richt. As de Franzoos' dat
söög. wöör em doch een beten anners to Moot; he bedank sik veelmaals un
marschier wider - aver nich na Asendörp, sünnern trüch na Jeßborg. He harr dat
nu doch mit de Angst kregen un dach in sienen Sinn, wenn düsse eenfache Buur al
so stark is, dat he en ganze Ploog mit een Hand in de Höcht böörn kunn, wo stark
müß denn woll erst de "starke Hinnerk" sien, un he verzicht to sien Glück darup,
Hinnerk uptosöken un sien Kräft mit em to meten. He sleek sik in sien Quartier
un leet sik vöreerst nich wedder in'n Kroog seen.
Egentlich is dat schaad, denn ik glööw, de starke Hinnerk
harr em woll wiest, wat en Lüünbörger Buursmann is, dat den Franzoosen Höörn un
Seen vergaan wöör. Düsse lütte Geschicht, de meer as 140 Jaar trüchlicht, ward
hüüt noch in Asendörp vertellt un daar heff ik se ook vun en Buurn höört. Keen
weet noch meer Geschichten över düssen starken Hinnerk vun Asendörp?